Ca-é Abu keu Sinyak Husna

Bismillahirrahmanirrahim,

Posting lôn uroë nyoë nakeuh posting keu Sinyak dara lôn nyang meutuah... Meukeusud haté keuneuk peugöt keudroë ca-é teuntang jih, tapi chit hana lôn carong bak peugöt2 nyang lagèë nyan..., :D Jadi, lôn lakèë izin Abu Sinyak, lôn posting ca-é nyang geupeugöt uroë jéh mantöng...

InsyaAllah dô'a kamoë keu Sinyak meutuah, beu Neupeukabui ya Allah, beujeuët Sinyak lôn keu aneuk shaléhah..., hiasan keu kamoë di akhirat baqa...,

wassalam,

Ca-é Abu keu Sinyak Husna

Assalamu'alaikum sibintang Timu
Gaséh Mi ngön Abu hana bandéng sa
Bak Allah sabé geutanyoë seurah droë
Gata nyak sidroë boh haté Poma

Uroë ngön malam kamoë meulakèë
Ya Allah sinyak nyoë sabë Neujaga
Beu Neubri sinyak udép shaléhah
Sibagoë muslimah nyang pujoë Rabbana

E ya Tuhan Azza wa jalla
Keu sinyak Husna Neubri bahgia
Neupeutoë sabé deungön akhirat
Chit ka meuhat nyan nyang keukai baqa

Beu Neubri sinyak udép lam tabah
Deungon ujoë Droëneuh Nyang Kuasa
Bèk disurôt pih meusilangkah
Meunyö nyang hak ka pasti beuna

Ya Allah Karim nyang po sinyak nyoë
Jantông haté kamoë sinyak bahgia
Neugaséh sinyak malam ngön uroë
Bak Allah sidroë nyang na kuasa

***